Bwrdd

David Jones OBE DL

Cadeirydd

Mae David Jones yn ymgymryd â'i rôl newydd fel Cadeirydd Cymwysterau Cymru ym ar 1af mis Hydref 2019, cyn ymddiswyddo fel Prif Weithredwr Coleg Cambria ar ddiwedd 2019.

Cymwysterau Cymru yw'r sefydliad annibynnol sy'n rheoleiddio cymwysterau nad ydynt yn raddau yng Nghymru.

Cafodd David ei eni yn Aberystwyth a'i fagu yng Ngheredigion, ac mae wedi astudio neu wedi gweithio ym mhob rhan o Gymru.  

Ac yntau'n Beiriannydd Siartredig, mae gan David fwy na 30 mlynedd o brofiad o weithio ym maes Addysg Bellach ac Addysg Uwch. Cafodd ei benodi'n Bennaeth/Prif Weithredwr Coleg Deeside gyntaf yn 2004 ac ers hynny mae wedi arwain y tair proses uno a arweiniodd at greu Coleg Cambria yn 2013. 

Caiff Coleg Cambria ei gydnabod ledled Cymru a'r Deyrnas Unedig am ei arloesedd, ei bartneriaethau cryf ag ysgolion, a chryfder ei gysylltiadau â'i gymuned a'i economi leol. 

Mae penodiadau allanol presennol David yn cynnwys cadeirio Bwrdd Ardal Fenter Glannau Dyfrdwy, Bwrdd AMRC Cymru, pwyllgor Gogledd Cymru o’r CBI a ffurfiwyd yn ddiweddar, ac mae'n is-gadeirydd y Grŵp Cydweithredol sy'n cynnwys y colegau blaenllaw yn y DU. Mae hefyd yn aelod o Grŵp Cynghori ar Ewrop Llywodraeth Cymru. 

Penodwyd David yn Ddirprwy Raglaw Clwyd ym mis Mawrth 2010 a chafodd ei urddo'n OBE yn Rhestr Anrhydeddau y Flwyddyn Newydd 2015 er mwyn cydnabod ei wasanaethau i addysg. Hefyd, enillodd David y wobr am Arweinydd Addysg Bellach y Flwyddyn y DU TES yn 2017.

Philip Blaker

Prif Weithredwr

Daeth Philip yn Brif Weithredwr ym mis Awst 2015, ar ôl ymuno â Llywodraeth Cymru dros dro ym mis Hydref 2014, wrth gychwyn y sefydliad. Cyn hynny, bu'n Gyfarwyddwr Gweithrediadau yn UCAS, lle roedd yn gyfrifol am ddarparu gwasanaethau derbyn UCAS o ddydd i ddydd, gan gynnwys prosesu ceisiadau, casglu data cyrsiau a gwasanaethau dilysu. Ymunodd ag UCAS ym mis Tachwedd 2011, ar ôl gweithio gyda'r sefydliad fel ymgynghorydd rheoli. Mae gyrfa Philip wedi canolbwyntio ar ddarparu gweithrediadau ar raddfa fawr, a chyn iddo gael ei benodi'n ymgynghorydd gyda PwC, roedd ganddo hanes o ddarparu asesiadau ac arholiadau cenedlaethol. Roedd Philip yn Gyfarwyddwr Gweithrediadau Prawf ar gyfer yr Asiantaeth Datblygu Cymwysterau a Chwricwlwm, ac yn rhan o'r uwch fwrdd rheoli gyda bwrdd arholi AQA. Mae gan Philip gymhwyster ôl-radd mewn rheoli busnes ac mae'n rheolwr prosiect a rhaglen cymwysedig.

Angela Maguire-Lewis

Aelod Bwrdd

Mae Angela Maguire-Lewis yn uwch reolwr profiadol iawn sydd wedi gweithio ym maes Dysgu Seiliedig ar Waith am 25 mlynedd. Mae wedi rheoli contractau dysgu seiliedig ar waith yng Nghymru, yr Alban a Gogledd Iwerddon.

Mae gan Angela brofiad a gwybodaeth fanwl o'r broses o ddylunio, darparu a gwerthuso rhaglenni prentisiaeth, cyflogadwyedd a chwricwlwm amgen. Mae wedi cynrychioli darparwyr Dysgu Seiliedig ar Waith yn ei rôl flaenorol fel Aelod o Fwrdd Ffederasiwn Hyfforddiant Cenedlaethol Cymru, ac fel aelod o gyfarfodydd rhanddeiliad allanol ar gyfer addysg a sgiliau ôl-16 yng Nghymru.

Claire Morgan

Aelod Bwrdd

Mae Claire Morgan yn uwch arweinydd prifysgol profiadol ym maes dysgu, addysgu a gwella profiad y myfyriwr. Fe'i penodwyd yn ddiweddar i ymgymryd â rôl y Cyfarwyddwr Ymgysylltu â Myfyrwyr a Chymorth Addysg ym Mhrifysgol Caerdydd, ar ôl iddi weithio mewn swyddi uwch â chyfrifoldeb am ddysgu, addysgu ac ansawdd ym Mhrifysgol Metropolitan Caerdydd ac fel Deon Cyswllt Ansawdd a Safonau ym Mhrifysgol Caerdydd.

Gyda chefndir academaidd fel Uwch Ddarlithydd mewn Economeg, a phrofiad o ddarlithio mewn amrywiol sefydliadau Addysg Uwch y DU ers 1993, cymhwysodd Claire fel athrawes Addysg Uwch ym 1997, ac yn 2017, dyfarnodd yr Academi Addysg Uwch Brif Gymrodoriaeth iddi (Advance HE erbyn hyn), fel cydnabyddiaeth allanol o'i chyfraniad a'i chyflawniad wrth wella dysgu ac addysgu ym maes addysg uwch.

Mae Claire hefyd yn gweithio i'r Asiantaeth Sicrhau Ansawdd fel Adolygydd Addysg Uwch academaidd, ac fe'i penodwyd yn ddiweddar yn Gadeirydd newydd WISE (Menter Cymru ar gyfer Ymgysylltu â Myfyrwyr).

Isabel Nisbet

Aelod Bwrdd

Mae Isabel Nisbet wedi cael gyrfa ym maes gwasanaeth cyhoeddus a rheoleiddio, yn enwedig addysg ac asesu addysgol. Bu mewn nifer o swyddi yn y gwasanaeth sifil yn yr Alban a Lloegr, ac yn 2008 daeth yn Brif Swyddog Gweithredol cyntaf Ofqual, y rheoleiddiwr arholiadau a chymwysterau yn Lloegr. O 2011 i 2014, bu’n gweithio yn Ne-ddwyrain Asia ar ran Cambridge International Examinations. Mae Isabel yn Ddarlithydd Cyswllt yn y Gyfadran Addysg, Prifysgol Caergrawnt. Mae'n gwasanaethu ar Fyrddau Prifysgol Swydd Hertford a'r Coleg Prifysgol Osteopathi, ac mae ar ddau bwyllgor sy'n cynghori'r Llywodraeth ar gwestiynau moesegol.

Dr Caroline Burt

Aelod Bwrdd

Mae Dr Caroline Burt yn Gyfarwyddwr Derbyn ac yn Gyfarwyddwr Astudiaethau Hanes yng Ngholeg Penfro, Prifysgol Caergrawnt. Mae hanes gyrfa Caroline yn cynnwys swydd fel dadansoddwr treth i Arthur Andersen Accountants fel rhan o Raglen Ysgoloriaeth Blwyddyn i Ffwrdd y cwmni. Mae Caroline yn aelod o sawl pwyllgor ym Mhrifysgol Caergrawnt. Mae Caroline wedi ennill nifer o wobrau drwy gydol ei gyrfa, ac ar hyn o bryd mae'n ysgrifennu llyfr ar hanes y drydedd ganrif ar ddeg a'r bedwaredd ganrif ar ddeg i Faber & Faber.

Ellen Donovan

Aelod Bwrdd

Mae Ellen Donovan yn Gyfarwyddwr Bwrdd Rheoli profiadol, ac mae ganddi dros 25 mlynedd o brofiad busnes yn y Sector Preifat. Mae ei rolau blaenorol yn cynnwys Cyfarwyddwr Masnachu lle roedd yn gyfrifol am ddatblygu Brandiau, Cynnyrch a Gwasanaethau yn Debenhams PLC, a Chyfarwyddwr Gweithrediadau, lle arweiniodd gweithlu o fwy na 5,000 o aelodau o staff. Mae Ellen yn aelod o Fwrdd Llywodraeth Cymru.

Robert Lloyd Griffiths OBE

Aelod Bwrdd

Robert Lloyd Griffiths yw Cyfarwyddwr Sefydliad y Cyfarwyddwyr (IoD) yng Nghymru ar hyn o bryd, a chafodd ei benodi i'r swydd yn 2009 ar ôl gweithio ym maes hysbysebu, Cysylltiadau Cyhoeddus, marchnata a chyfathrebu. Mae'n aelod o Gyngor Adnewyddu'r Economi y Prif Weinidog ac yn aelod o Grŵp Cynghori Busnes Ysgrifennydd Gwladol Cymru, ac mae hefyd wedi cadeirio/bod yn aelod o nifer o gyrff adolygu a grwpiau gorchwyl a gorffen Llywodraeth Cymru.

David Jones

Aelod Bwrdd

Dechreuodd David Jones ei yrfa fel Pennaeth Technoleg yn Aspro Travel Group yng Nghaerdydd ac aeth ati i sefydlu nifer o gwmnïau technoleg gan gynnwys Travelink Systems Limited, Tigerbay Software Limited a hefyd Westgate Cyber Security, lle mae'n Gyfarwyddwr ar hyn o bryd. Mae gan David swyddi Anweithredol yn Awdurdod Cyllid Cymru a Bwrdd Iechyd Aneurin Bevan, ac mae'n arbenigo mewn deall y newidiadau yn y byd digidol heddiw.

Dr Arun Midha

Aelod Bwrdd

Mae Arun wedi datblygu portffolio o rolau anweithredol ac aelod lleyg ym meysydd rheoleiddio, safonau, llywodraethu, iechyd ac addysg. Ar hyn o bryd, mae'n gadeirydd adolygiadau gofal iechyd parhaus ôl-weithredol yng Nghymru; aelod lleyg ar y Pwyllgor Dethol ar Safonau, Tŷ'r Cyffredin; archwiliwr achos i Goleg Brenhinol y Milfeddygon; aelod lleyg o'r Cyngor Fferyllol Cyffredinol. Ymhlith ei rolau diweddar roedd rôl fel aelod lleyg o'r Cyngor Meddygol Cyffredinol lle roedd yn Gadeirydd Adnoddau ac yn aelod o'r pwyllgor Addysg, ac yn sgriniwr lleyg yn asesu cwynion yn erbyn Meddygon; roedd hefyd yn aelod o Gyngor Cyllido Addysg Uwch Cymru.

Mae Arun wedi gwasanaethu fel Ynad Heddwch ac roedd hefyd yn Uchel Siryf De Morgannwg yn 2012. Mae'n Llywodraethwr yn Ysgol Gyfun Gymraeg Plasmawr ac yn Asesydd Gwobrau Pen-blwydd y Frenhines ar gyfer Addysg Bellach ac Uwch. Bu'n ddyfarnwr rygbi o fewn Undeb Rygbi Cymru ac ar hyn o bryd mae'n Ymddiriedolwr ac yn ysgrifennydd anrhydeddus Ymddiriedolaeth Elusennol Rygbi Cymru. Mae'n un o gefnogwyr brwd Elusennau Achub y Plant a Street Child United. Mae ganddo docyn tymor ar gyfer Clwb Pêl-droed Dinas Abertawe.

Anne Marie Duffy OBE

Aelod Bwrdd

Mae Anne Marie wedi gweithio yn y sector addysg yng Ngogledd Iwerddon fel athro, uwch reolwr a Chyfarwyddwr. Ar hyn o bryd mae'n arbenigwr annibynnol ar gwricwlwm ac asesu ac yn cymryd rhan mewn prosiectau a ariennir gan yr UE. Bu Anne Marie yn Gyfarwyddwr Cymwysterau (Swyddog Cyfrifol) o fewn y Cyngor Cwricwlwm, Arholiadau ac Asesu (CCEA), gan gyfarwyddo gwaith cynllunio, gweithredu, cynnal a graddio arholiadau TGAU a TAG.  Rhwng 2010 a 2017 bu'n cyfarwyddo ac yn arwain rhaglen trawsnewid digidol y CCEA, gan gynnwys y newid i farcio ar y sgrin a datblygiad meddalwedd dadansoddi data i gefnogi gwelliannau mewn addysgu a dysgu. Bu'n cynrychioli'r CCEA ar Fforwm Prif Weithredwyr y Cyd-bwyllgor Cymwysterau (JCQ), ac yn Gadeirydd Anweithredol ar Bwyllgor Llywodraethu Cymwysterau'r Bwrdd Arholi Cenedlaethol ar gyfer Iechyd a Diogelwch Galwedigaethol (NEBOSH). Mae'n parhau i wasanaethu fel Cadeirydd Pwyllgor Cwricwlwm ar sawl Bwrdd Llywodraethwyr mewn ysgolion o bob math.   Mae gan Anne Marie radd MA mewn Cynllunio a Datblygu'r Cwricwlwm. 

Jayne Woods

Aelod Bwrdd

Mae Jayne yn un o gymrodorion Sefydliad Cyfrifwyr Siartredig Cymru a Lloegr ac mae ganddi dros 20 mlynedd o brofiad fel gweithiwr cyllid proffesiynol. Y mae wedi gweithio gyda byrddau gweithredol ac wedi gwasanaethu arnynt ers dros ddegawd, gan ganolbwyntio ar gyllid, llywodraethu risg ac effeithlonrwydd ac effeithiolrwydd gweithredol.

Treuliodd Jayne wyth mlynedd yn Deloitte, fel archwilydd i ddechrau ac yna fel ymgynghorydd rheoli gan weithio gydag amrywiaeth o gleientiaid yn y DU a thramor. Y mae wedi gweithio mewn nifer o uwch-swyddi cyllid yn y sector cyhoeddus a'r sector preifat, gan gynnwys Prif Swyddog Cyllid Comisiynydd yr Heddlu a Throseddu Dyfed-Powys. Mae wedi gwasanaethu ar fwrdd Cymdeithas Tai Bro Myrddin am gyfnod o saith mlynedd, a hynny fel aelod o'r bwrdd, Is-gadeirydd a Chadeirydd.

Mae'n un o hyrwyddwyr Cymdeithas Fuddiannol y Cyfrifwyr Siartedig ac mae wedi gweithio mewn nifer o swyddi trysorydd gwirfoddol yn y gymuned leol.